“Қора бозор”даги қора қилмиш

Тирикчилик тошдан қаттиқ. Бироқ бу инсонни жиноятга, эгри йўлга бошлашга баҳона бўлолмайди. Одамзод ҳар қандай вазиятда ҳам ҳалол, тўғри йўлда юришга мажбур. Аммо ҳою ҳавасга берилган, меҳнатсиз енгил даромад топишни касб қилганлар ҳам орамизда йўқ эмас.

Кармана ҳамда Навбаҳор фар­занд­лари А. Зокиров ва Ҳ. Салимовлар (ма­қоладаги бар­ча исм-фамилиялар ўзгартирилган) билаги қувватга тўла айни йигитлик пайт­лари­да эгри­лик­ни танлашди.

Шоввозлар Навоий шаҳридаги мар­казий деҳқон бозорида чет эл ва­лютаси савдоси билан шуғул­ла­ниб, долларни сўмга, сўмни доллар­га ай­лантириб, тирикчилик қила бош­ладилар.

Кунларнинг бирида А. Зокировнинг ёни­га бир аёл келиб, 35 миллион сўм пули бор­лигини, уни тезда долларга алмаштириши лозимлигини айтади. Мўмайгина енгил даромад ҳидини пайқаган Зокировнинг ичи­га ғулғула тушди. Ўзида шунча пул йўқлиги са­баб, ҳамтовоғи Салимовга доллар ке­раклигини билдиради, ёнидаги аёлни унинг олдига бошлаб боради. Икковлоннинг ҳам мақсади бир — сў­ралган миқдордаги валютага эга бўл­масалар-да, бир амаллаб аёлнинг пу­лини олиб қолиш. Шу куни масала ечилмади. Эртасига Ҳ. Салимовга му­рожаат қилган аёл ҳеч бўлмаса 300 АҚШ доллари топиб беришини сў­рай­ди. Шу тариқа аввал 300 доллар олиб, 1-2 кун ичида қолган маблағни ҳам олиш шарти билан пулларини таш­лаб кетади.

Белгиланган кун марказий деҳқон бо­зоридаги озиқ-овқат дўконлари­нинг бирида Салимов келишилган дол­ларларни эгасига бераётганда тўсатдан ҳуқуқни муҳофаза қилувчи ор­ганлар вакиллари келиб қоли­шади...

Жорий йилнинг июль ойида мазкур қонун­бузарлик жиноят ишлари бў­йича Навоий шаҳар судида кўриб чи­қилди. Унда жиноят­чилар айбини тан олиб, қилмишларидан пушаймонли­гини билдирди. Уларга нисба­тан Ўз­бекистон Республикаси Жиноят ко­дексининг тегишли моддаларига кўра, энг кам ойлик иш ҳақининг 30 ба­равари миқ­дорида жарима жа­зоси тайинланди.

Юқоридаги ҳолат юзасидан жи­ноят­га қонун муқаррарлиги ўз ис­ботини топди, бироқ "судланган", де­ган тамға барибир қонунбузарлар­нинг зиммасидан холи бўлгани йўқ. Албатта, ҳар бир ишни амалга оши­риш­дан олдин унинг қонуний асос­лари­ни пухта ўрганиш лозим. Ўз ман­фаатини кўзлаб, мамлакатнинг жо­рий қонунларини менсимаслик ҳеч бир фуқаролик бурчига ҳам, ин­со­ний­ликка ҳам мос эмас.