Сохтакор ветеринарларнинг қилмиши

Шайтоний нафс инсон бўйнига баъзан шундай арқон ташлаб, унга қилаётган ишини завқли ва жозибадор қилиб кўрсатадики, хом сут эмган банда ана шу фурсатда амалларини ҳеч бир мезонга ўлчаб ҳам кўрмайди. То оёғи тойгунча  йўлида давом этаверади...

Жорий йилнинг баҳор-ёз ойларида ви­лоя­­тимиз ветеринария корхоналарида олиб борилган жиноят-қидирув ишлари уш­бу соҳада ҳудудда сохта ҳужжатлар тўл­дириш, таниш-билишчилик каби жиноят­лар кенг қулоч ёйганини кўрсатди.

Хусусан, Кармана туман ветеринария бў­лимида 2010 йилдан бош ҳисобчи бўлиб иш­лаб келган О. Самадов (исм-фами­лия­лар ўзгартирилган) бир қатор жиноятларга қўл уради. Юртимиз меҳнат қонунчилигида интизомий жазо қўлланилиб турган хо­дим­га рағбатлантириш чоралари кўрилмас­ли­ги қатъий белгилаб қўйилган бўлса-да, бош ҳисобчи мазкур моддани четлаб ўта­ди. Иш фаолияти давомида жами 8 мил­лион сўмдан ортиқ маблағларни ходим­лар­га нотўғри рағбатлантириш мукофоти си­фатида ҳисоблаб, давлат бюджетини та­лон-торож қилади. 

Навоий шаҳар ветеринария бўлими бош ҳи­собчиси ҳам худди шу жиноятни амалга оширади. 2012 йилдан буён фаолият юри­тиб келган С. Ҳакимовнинг сохтакорлиги дав­­латга 6 миллион сўмлик зарар кел­тирди.

Ветеринарларимиз зиммасидаги яна бир масъулият бозорларимизга талабга жа­воб бермайдиган гўшт маҳсулотлари ки­риб боришининг олдини олиш сана­ла­ди. Белгиланган тартиб бўйича қассоблар мол сўйилишидан олдин уни ветеринар кўри­гидан ўтказишади. Мол гўшти сифатли бўл­са, улар учун форма-4 ҳужжати рас­мий­­лаштириб берилади. Ушбу ветерина­рия хизмати учун давлат божи тўланиб, тўл­дирилган ҳужжатни тегишли бозорнинг ветеринария-санитария экспертизаси кў­ригига топширилади. Якуний хулосадан сўнг­гина гўшт маҳсулотини сотишга рухсат берилади. 

Айрим ветеринарларимизнинг ана шун­дай масъулиятли ишга бепарво ёнда­ши­шини ҳеч нарса билан оқлаб бўлмайди. Ху­сусан, Кармана туман ветеринария бў­лими ветучастка мудири А. Ҳодиев 2010 йил­дан буён шу лавозимда ишлаб келиб, 7 йил давомида жами 24 миллион сўмдан ортиқ форма-4 ҳужжати учун тўланган маб­­­лағларни давлат хазинасига топшир­ма­ган. Бундан ташқари, у ўз ишига совуқ­қонлик билан ёндашиб, 14,5 миллион сўм­лик ҳужжатларни сохта тўлдирган.

Мазкур тумандаги "Маликработ" ве­­т-­у­частка мудири Д. Сафоев, Навоий шаҳар ветеринария бўлими вет-санитари О. Но­ди­ровлар ҳам айни жиноятга қўл уришган. Улар ҳам сохта ҳужжатлар эвазига ўзгалар да­­ромадини ўзлаштирган.

Юқоридаги қонунбузарликлар юзасидан олиб борилган жиноят-қидирув ишлари ви­лоятимиз ветеринария соҳасидаги доғ­ни яққол намоён этди. Жорий йилнинг июль ойида жиноят ишлари бўйича Кар­мана туман судида ушбу иш кўриб чиқил­ди. Барча далиллар ҳамда гувоҳларнинг кўр­сатмалари жиноятга жазо муқаррарли­ги­ни исботлади. Суд ҳукмига кўра, жи­ноят­чи ветеринарларга озодликни чеклаш, ман­сабдорлик ва моддий жавобгарлик ла­возимларида ишламаслик, даромадининг 15 фоизини давлат фойдасига ундириш каби жазолар тайинланди.

Инсонларнинг саломатлиги билан боғ­лиқ масалада юқоридаги каби бепар­во­ликка йўл қўйиб бериш мумкинми, ахир? Улар­нинг хуфиёна ҳаракатларидан ҳамма бехабар бўлгандек, гўё? Йўқ, албатта. Шу чоқ­қача жиноятчиларни инсофга чақира­диган, қонуний ишлашга ундайдиган бирор мард топилмагани аслида янада кўпроқ кишини ташвишга солади.

Меҳнатсиз мўмай пул топмоқчи бўлган ким­саларнинг юқоридаги қилмиши киши хаёлига ана шундай ўйни солади. Ахир, ҳар бир ҳаракатнинг қонуний мезони, ин­соний асослари йўқми? Жиноят содир этганлар камида 40-50 ёшда эканлигини ҳисобга олсак, уларни "хом сут эмган бан­далар-да", дея оқлаб бўлармикан?

Н. РАЖАБОВ.